Monday, 17 December 2018

පොළොන්නරුව යුගය එක්සේසත් කළ පළමුවන විජයබාහු රජතුමා ගැන දැන ගනිමු


මව ලෝකිතා කුමාරිකාවය. පියා මොග්ගල්ලාන කුමාරයාය. මව් දාඨෝපතිස්ස පරපුරෙන්ද පියා පස්වන මිහිඳු පරපුරෙන්ද පැවත ආවෝය.

ක්‍රි.ව 1039 දී ලෝකිතා කුමරියට උපන් පුතා “කීර්ති” නම් විය. මේ වකවානුව වනවිට ලංකාවේ උතුරුකරය සොලී ආධිපත්‍යයට යටත්වී තිබුණි. පොලොන්නරුව ‘ජනනාථපුරය’ ‘පුලස්තිපුරවරය’ යන සොලී නම්වලින් පාලනය කළ හින්දු භක්තිකයෝ දකුණු පලාතේ කිසිවකුටත් උතුරු කරයේ සැරි සරන්නට පවා ඉඩක් නොතැබූහ.

වෙහෙර විහාර කඩා සමතලා කර දමා ශිව කෝවිල්-ගණදෙවි කෝවිල් ගම්මඩු තනාගත් සොලීහු ඉපැරණි මන්දිර මණ්ඩප පොත්ගුල් බිඳ දැමූහ. වැව් අමුණු කඩා දමා තිබුණි. උදාර ජාතියක් වශයෙන් බුදුදහමේ පිහිටෙන් රජරට ගොඩනගා තිබූ ඉසුරුබර පරිසරය සොලීන් විසින් විනාශකර දැමීම දකුණේ සිංහලයන් විසින් විඳ දරාගත්තේ අපමණ හිත් වේදනා විදිමිනි. කොයි මොහොතක හෝ රජරට නිදහස් කර ගැනීමට අවස්ථාවක් සලසා ගැනීමට දකුණු කරයේ සිංහලයෝ පුල පුලා සිටියහ.

කඩු ශිල්ප දුනු ශිල්ප අසු මෙහෙයවීම පමණක් නොව සියළු යුද ශිල්ප හදාරා මලයරට අධිපති ධූරයට පත් කීර්ති නම් නෑඹුල් තරුණයාගේ ඉරණමට හරස්වූයේ අපේම ජාතියේ අපේම වර්ගයේ අපේම රදලයන්ය. ඒ වනවිට කතරගම අධිපති ධූරය හෙබවූ ලෝකේශ්වර රජ කීර්තිගේ නැගීසිටීමට විරුද්ධව යටිකූට්ටු ව්‍යාපාරයක් දියත් කලේය. පුරා අවුරුදු 6ක් තිස්සේ සටන් වැදෙමින් සිටි ලෝකේශ්වරයන් මියයන තුරුම කීර්තිට උතුර ගලවාගන්නට ඉඩ නොදුන්නේය.

ඉක්බිතිව කතරගම රජ බවට පත් කේශධාතු කාශ්‍යපද කීර්ති තුන් සිංහලයේම රජ බවට පැමිණෙනවාට විරුද්ධව සටන් ව්‍යාපාරයක් ගෙන ගියේය. පස්යොදුන් රටින් කැඳවූ සෙබල මුලක් රැගෙන කේශධාතු කාශ්‍යප හා සටන් වැද ඔහු කතරගමින් පලවා හැරි කීර්ති උතුරට යාමට තීරණය කර ගත්තේය. කීර්ති විජයබාහු නමින් අභිෂේක වුවද, තමාට ඇති එකම අභියෝගය උතුර සොලීන්ගෙන් බේරාගැනීම වුවද, එය පහසුවෙන් කළ කළ හැක්කක් නොවන බවද, තේරුම් ගත්තේය.

විජයබාහු රුහුණේ සිට උතුර ගැන සිතන විටත් ඒ බව උතුරුකරයේ සොලී පාලකයෝ දැනගත්හ. වහාම විශාල සොලී සේනාවක් කතරගම සිටින විජයබාහු විනාශ කර දැමීමට පිටත් කරන ලදි. සූදානමක් නැතිව සිටි විජයබාහු යුද උපායන් යොදා ගනිමින් කතරගම හැර කදුරටට පලා ගියේය. සොලීහු කතරගම දෙසවූ වෙහෙර විහාර බලකොටු බිඳ සුනු විසුනුකර ජයග්‍රාහීව ආපසු උතුරට ගියෝය.

විජයබාහු නොපමාව ආපසු කතරගම බලා ගොස් සේනාව තර කලේය. ලුනු, පොල්, වී ගබඩා කර ජනතාවට අවශ්‍ය පහසුකම් සැලසුවේය. මේ වනවිට රජරට වැසියන් සොලීන්ට විරුද්ධව කුමන්ත්‍රණ, සාකච්ඡා ඇතිකර තැන තැන කැරලි ව්‍යාපාර දියත් කර තිබුණි. යුද වැද සොලීන්ට හොඳ පාඩමක් උගන්වන්නට අවස්ථාව සොයාගත් විජයබාහු හමුදා සේනාවක් කැදවූවේය.

නැගෙනහිර වෙරලාසන්නයෙන් ගමන්කර පොළොන්නරුවට පහරදීමටද බටහිර වෙරලාසන්නයෙන් ඉදිරියට ගොස් අනුරාධපුරයට පහරදීමටද, හමුදාවක් රැගෙන මහියංගනය පසුකර පොලොන්නරුව සොලී බලකොටුවලට කඩාවැදීමටද, විධි විධාන යෙදවිනි. 1070දී ත්‍රිකෝණ සටන් ව්‍යාපාරය රජරට පීරා පොලොන්නරු පුරවරයෙහි සොලීන් සමූල ඝාතනය කර ජනතා දුක් ගින්දර නිවාලීය. 1072දී රුහුණු මායා පිහිටි තුන්රටම එකම ධජයක් යටතේ පාලනයට පවරාගත් විජයබාහු පොලොන්නරුව “ශ්‍රී විජයරාජපුර” යනුවෙන් නම්කර අගනුවර කොට ගත්තේය.

කාලාන්තරයක් තිස්සේ සොලීන් විසින් කරන ලද තාඩන පීඩන ගැන සිතූ විජයබාහු තවත් යුධ උපක්‍රමයක් වශයෙන් අසල්වැසි රටවල බලවත් රජුන් තමන් වෙත ඈදා ගැනීමටද, උපක්‍රමශීලී පියවර කීපයක් ගත්තේය.
බිරිඳක් වශයෙන් කනමුජ්ජි ජගතපාල රජුගේ දියණිය ලීලාවතී තම බිසව වශයෙන් ගෙන්වා ගත්තේය. කාලිංග රාජවංශික කුමාරියක් වූ තිලෝක සුන්දරියද බිසවක් කරගත් විජයබාහු තම නැගණිය මිත්තාවන්ද පඬිරට කුමාරයෙකුට සරණපාවා දුන්නේය.

අවුරුදු දහසකටත් අධික කාලයක් මුළුල්ලේ සිංහල රාජාවලියේ පින්වත් රජ දරුවන් ගොඩනගා සොලීන් විසින් සුනු විසුනු කර තිබූ වෙහෙර විහාර මන්දිර වැව් අමුණු දාගැබ් පිළිම විජයබාහු ඒ වූ පරිද්දෙන්ම යලි පිළිසකර කරවූයේය.

පොලොන්නරුවේ නව දළදා මන්දිරයක්ද, නව මහල් මන්දිර කීපයක්ද අළුතෙන් ඉදිකළ අතර ප්‍රතිසංස්කරණ කටයුතු වෙනුවෙන් සිය ධනයත් කාලයත් මහ පරිමාණයෙන් වැය කළේය. එහි ප්‍රථිපලයක් වශයෙන් රටවැසියෝ සුඛිත මුදිත වූහ. රටට සෞභාග්‍යය උදාකළ මහා විජයබාහු රජ ක්‍රි.ව 1111 වැන්නේ පරළෝසැපත් වූහ.

ශතවර්ෂ භාගයකටත් වැඩි කාලයක් මේ රටේ සම්පත් සූරාකමින් ජාතික සම්පත් විනාශ කරමින් රට වැසියා තලා පෙලා වෙහෙර විහාර, දාගැබ්, පෙතිපිළිම බිමට හෙලූ සොලී බලය සුන් කිරීමට විජයබාහු රජුට සිදුවූයේ තනිවමය. දුටුගැමුණු රජුට සංඝයා වහන්සේගෙන්ද, මව්ගෙන්ද, රැකවරණය ලැබිණි. පරාක්‍රමබාහු රජුටද ඒ වෙනුවට තනිවම සටන්කර සොලීන් එළවා දැමීමේ කාරයයටත් වඩා අභ්‍යන්තරයේ හතුරුකම් මැද සොලීන් පළවා හැරීමට සිදුවිය. එවන් වාතාවරණයක් යටතේ මහා විජයබාහු හෙල රාජවලියේ වීර සිංහලයෙකු වශයෙන් සටහන් විය යුත්‍ය.


(උපුටා ගැනීම - නිමල් ප්‍රේමතිලක මහතාගේ අපේ ජාතික වීරයෝ කෘතියෙනි) 

Tuesday, 1 May 2018

ලොවක් සැනෙකින් විනාශ කළ හැකි න්‍යෂ්ටික ආයුධ වල උපත මෙසේ සිදුවිය


න්‍යෂ්ටික ශක්තියෙන් න්‍යෂ්ටික ආයුධ නිපදවිය හැකි බව ප්‍රථමයෙන්ම පැවසුවේ ක්‍රි.1938 දී ජර්මන් ජාතික ඔටෝහාන් ලීසේ මයිට්නර් සහ ෆ්රිට්ස් ස්ට්‍රාමන් ය.
ජර්මනිය මෙම භයානක ආයුධ නිපදවීමේ නිරත වන බව දැනගත් ඕලන්ද ජාතික රසායන විද්‍යාඥ නීල්ස් බෝහර් ක්‍රි.1939 ලෝක යුද්ධය කට ළගට ආ විට ඇමරිකාවට ගොස් ඒ ගැන පැවසීය. ජර්මනිය එය නිපදවූවා නම් මහා විනාශයක් සිදුවන බව ඔහු දැන සිටියේය.
ඒ අනුව ඇමරිකානු ජනාධිපති රූස්වෙල්ට් වෙත ඇමරිකාව විසින් ප්‍රථමයෙන් පරමාණු බෝම්බය නිපදවීමේ අවශ්‍යතාව අවධාරණය කෙරුණි.
ජනාධිපති රූස්වෙල්ට් විසින් ලොව මෙතෙක් වඩාත් වියදමක් දැරූ එම ව්‍යාපෘතිය ආරම්භ කරන්නට උපදෙස් දුනි. එය ඉතාමත් රහසිගතව මෑන්හැට්න් ප්‍රොජෙක්ට් නමින් ක්‍රියාත්මක විය.
ක්‍රි.1945 මැයි 16 වන දින ලොව ප්‍රථම න්‍යෂ්ටික අවිය වූ යුරේනියම් 235 බෝම්බය නිව් මෙක්සිකෝවෙහි කාන්තාරයක පුපුරුවා හැරුණි.
ඒ සමගම නිපදවූ ඊලඟ පරමාණු බෝම්බ දෙකක් යුරේනියම් 235 එම වසරේ අගෝස්තු මස 6 වන දින හිරෝෂිමාවටද, ප්ලූටෝනියම් 235 අගෝස්තු මස 9 වෙනිදා නාගසාකි වෙතද ඇමරිකාව විසින් හෙලන ලදී. එයින් ඇතිවූ ප්‍රථිපල සමග දෙවන මහා ලෝක යුද්ධයද හදිසියේ අවසන් විය.

ජපානයටත්, ජර්මනියටත් ප්‍රායෝගිකව බෝම්බ නිපදවිය නොහැකි වූ අතර ඇමරිකා එක්සත් ජනපදයෙන් සොරාගත් දත්ත මත ක්‍රි.1949 දී ලොව දෙවන න්‍යෂ්ටික බලවතා බවට සෝවියට් සමූහාණ්ඩුව පත්විය.

Friday, 27 April 2018

නිරෝගී දිවියක් උදෙසා පලතුරු ආහාරයට ගත යුත්තේ ඇයි දැයි විමසා බලමු




අපි හැමෝම ආසයි පලතුරු අනුභව කරන්න, නමුත් අපි ගෙවන කාර්‍යබහුල ජීවන රටාව නිසා බොහෝ දෙනෙක්ට මේ පලතුරු හා එළවළු තමන්ගේ ආහාරවලින් ඉවත් කරගන්න සිදුවෙලා තියෙනවා. මේ ලිපිය තුළින් අප අවධාරණය කිරීමට සැරසෙන්නේ ඔබගේ නිරෝගීභාවය උදෙසා පලතුරු ආහාරයට ගත යුත්තේ ඇයිදැයි විමසා බැලීමටයි.

ප්‍රතිඔක්සිකාරක ලෙස ක්‍රියා කරයි
පලතුරුවල අඩංගු සමහර විටමින් හා ඛනිජ ලවණ සිරුරෙහි ප්‍රතිඔක්සිකාරකයක් ලෙස ක්‍රියා කරයි. මෙහිදී ප්‍රතිඔක්සිකාරක ලෙස හැදින්වෙන්නේ අපේ සිරුරෙහි විවිධ රසායනික ක්‍රියාවලීන් නිසා නිර්මාණය වන හානිදායක අංශු විනාශ කිරීමේ ගුණය ඇති සංඝටකයකි. සිරුරේ සෛල හා පටකවලට සිදුවිය හැකි හානි අවම කිරීමට හෝ වැළැක්වීමට ප්‍රතිඔක්සිකාරකවලට පුලුවන.

ඔබව රෝගවලින් ආරක්ෂා කරයි
පිළිකා,දියවැඩියාව,හර්දයාබාධ,අංශභාගය,අධිරුධිර පීඩනය,ඇදුම,සන්ධි රෝග ආදිය වැළැක්වීමේ ප්‍රතිඔක්සිකාරක ගුණය පලතුරුවල අඩංගු වන අතර මෙම ප්‍රතිඔක්සිකාරක බහුලවම අඩංගු වන්නේ ගස්ලබු,දොඩම්,දෙළුම්,අන්නාසි,කොමඩු,අලිගැටපේර,අඹ,මිදි,ඇපල්,පේර ආදී පලතුරුවලය. එබැවින් මෙකී පලතුරු නිරතුරුවම ආහාරයට ගැනීම ඔබව රෝගවලින් ආරක්ෂා වීමට හේතුවේ.

දිනකට කොපමණ පලතුරු ප්‍රමාණයක් අවශ්‍යද?
අඹ,දොඩම්,කෙසෙල් වැනි මධ්‍යම ප්‍රමාණයේ පලතුරු ගෙඩි 2-4 අතර ප්‍රමාණයක් දිනකට සෑහේ. මීට අමතරව කුඩා පලතුරු වන වෙරළු,නෙල්ලි,ජම්බු,උගුරැස්ස,ලොවි ආදිය අඬු කෝප්ප 1ක් හෝ පලතුරු යුෂ වීදුරුවක් පානය කිරීම ප්‍රමාණවත් වේ. වියලි පලතුරු ලබාගන්නේ නම් තේ හැදි 4-6ක් අතර දිනපතා ගැනීම සෑහේ.

බොහෝවිට ලංකාවට විදේශ රටවලින් ගෙන්වන ඇපල් ආදී පලතුරුවලට විවිධ රසායනික ද්‍රව්‍ය අඩංගු වන අතර පලතුරු මිලදී ගැනීමේදී ඒ පිලිබදවත් ඔබ සැලකිලිමත් වීම ඉතා වැදගත් වේ. හැමවිටම ස්වභාවික හා නැවුම් පලතුරු සොයාගෙන අනුභව කිරීමට හුරුවන්න.

(මෙම ලිපිය සකස් කරනු ලැබූයේ මිහිර සඟරාව - 2018 පෙබරවාරි ඇසුරෙනි)



Tuesday, 3 October 2017

ලෝකය වටා මුහුදු චාරිකාවක් ගිය ප්‍රථම නැවියා: ෆර්නැන්ඩි මැගලන්



ලෝකය වටා මුහුදු චාරිකාවක් ගිය ප්‍රථම නැවියා ලෙස ඉතිහාසයට එක්වූයේ දේශ ගවේෂකයෙක් වූ ෆර්නැන්ඩි මැගලන්ය. ඔහු පෘතුගීසි ජාතික වංශවතෙක් විය. ක්‍රි.1480දී ඔහු උපන්නේය.
කොළොම්බස්ගේ මුහුදු චාරිකාවලින් පසුවද, බටහිරට යාත්‍රා කොට ඉන්දියාවට පිවිසීමට පුලුවන්ය යන මතයෙහිම සිටි ස්පාඤ්ඤ රජතුමා ෆර්නැන්ඩි ඇතුළු පිරිසක් එම කාර්‍ය සදහා යෙදවීය. මැගලන් මුලදී රජතුමා වෙත සේවයේ යෙදී සිට වරෙක නාවිකයෙකු හැටියට ඉන්දියාවට හා තවත් පෙරදිග රටවලට පැමිණීමෙන් ලබන ලද පලපුරුදුකම් ඇතිව සිටියේය.
ක්‍රි.1519 සැප්තැම්බර් 20 වන දින නාවිකයන් 2701 දෙනෙක් සමග නැව් 51කින් මැගලන් සිය ලෝක චාරිකාව ආරම්භ කළේය. ඔහු අත්ලන්තික් සාගරය හරහා දකුණු ඇමරිකාව දෙසට යාත්‍රා කළේය. මේ අවදිය වන විට දකුණු ඇමරිකාවේ දකුණේම පිහිටි තුඩුවක් දක්වා යාත්‍රා කිරීමට කිසිම නැවියෙකු දැන නොසිටි අතර එයින් ඔබ්බට යාත්‍රා කළ හැකි බවත් කිසිවෙක් නොදත්හ. ගමනේ පරතෙරක් නොදුටු නාවිකයෝ තවත් ඔබ්බට යාත්‍රා කිරීම ප්‍රතික්ෂේප කොට කැරළි ගැසූහ.
එක් නැවක් මැඩ පැවැත්වූ මැගලන් ධෛර්යය සම්පන්නව තව තවත් ඉදිරියට යාත්‍රා කොට, දකුණු ඇමරිකාවේ දකුණේම පිහිටි පෙදෙසේ උස් කුලුණු මුහුදුවලින් ගහණ (මෙකල මැගලන් සමුද්‍ර සංධිය) කපොල්ලෙන් ඔබ්බට යාත්‍රා කොට මහත් සාගරයට පිවිසියේය. එය පැසිපික් සාගරයයි.

ඉන්පසු තව තවත් වයඹ දෙසට යාත්‍රා කළ මැගලන් පිලිපීන් දූපත් වෙත ලඟාවිය. එහිදී ඔහු ස්වදේශිකයන් සමග කළ සටනින් මිය ගියේය. ඔහුගේ මරණින් පසුව ඩෙල්කානෝ නම් නාවිකයා කණ්ඩායමේ නායකත්වය ගෙන ඉදිරියට යාත්‍රා කළේය. මේ වනවිට ඔවුන්ට ඉතිරිව තිබුණේ නැව් 2ක් වූවද, එයින් එකක් බරපතල ලෙස අබලන් වූයෙන් මොලුක්කාස් දිවයින් අසලදී මුහුදුබත් කිරීමට සිදුවිය. ඉතිරි නැවෙන් ගමනේ යෙදුනු පිරිස් ඉන්දියන් සාගරය තරණය කොට සුභපැතීමේ තුඩුව වටා ගොස් අත්ලන්තික් සාගරයට පිවිස අප්‍රිකාවේ බටහිර වෙරළ ඔස්සේ ස්පාඤ්ඤයට ආපසු පැමිණියහ.
(මේ ලිපිය සැකසුනේ කේ.ආර්.ආරියසිංහ මහතාගේ “ලොවේ ශ්‍රේෂ්ඨයෝ” කෘතිය පාදක කරගෙනය)


Tuesday, 19 September 2017

වල් පැළ පාලනය සදහා රසායනික වල්නාශක භාවිතය

(Image Source - www.colombotoday.com )

වල්නාශක භාවිතය යනු ඕනෑම කෘෂිකාර්මික භූමියක වල් පැළෑටි මර්දනය කිරීම සදහා භාවිතා කළ හැකි සරලම හා පහසුම ක්‍රමවේදයයි. මේ නිසාම බොහෝ ගොවීන් කිසිම දැනුමක් හෝ පාලනයකින් තොරව මෙම වල්නාශක භාවිතා කිරීමට හුරුවී සිටිති. මීට හේතුව ලෙස දැක්විය හැකි වන්නේ ගැලපෙන වල්නාශක තේරීම හා යෙදීම පිළිබඳව ගොවීන්ගේ ඇති නොදැනුවත් කමයි.
එබැවින් අද දිනයේ කෘෂිකර්මය පාඩම යටතේ අප සාකච්ඡා කිරීමට බලාපොරොත්තු වන්නේ මෙම වගා බිමට යොදන වල්නාශක නිවැරදිව තේරීම සිදුකරන ආකාරය පිළිබඳවයි.

වල්නාශක තේරීම කරන්නේ කෙසේද?

ක්‍රියාත්මක වන ආකාරය හා මර්දනය වන වල්පැළෑටි සළකා බලා වල්නාශක වර්ග කිරීම සිදුකළ හැක.

1) ස්පර්ශ වල්නාශක

මෙහිදී වල්නාශකය තැවරුණු ශාක කොටස් පමණක් විනාශ කරලීම සිදුවේ. මේවා නැවත කොටස් 2කට වර්ග කළ හැකිය.
                -සියල්ල නසන වල්නාශක
මෙහිදී ස්පර්ශ වන වල්නාශකය සියලුම පැළ විනාශ කරලීම සිදුකරයි.
උදා: පැරකොට්

                -තෝරා නසන වල්නාශක
මෙහිදී ස්පර්ශ වන වල්නාශකය තෝරාගත් පැළ පමණක් විනාශ කරලීම සිදුකරයි.
උදා: 3,4 DPA

2) සංස්ථානික වල්නාශක

මෙහිදී සිදුවන්නේ අදාල වල්නාශකය වල් පැළයේ තැවරුණු ස්ථානයෙන් ශාකයට ඇතුළු වී සෑමතැනටම ගමන් කර මුලු පැළයම විනාශ කරලීමයි. මෙයද නැවත සියල්ල නසන හා තෝරා නසන ලෙස වර්ග කළ හැකිය.
                -සියල්ල නසන - ග්ලයිෆොසෙට්
                - තෝරා නසන - MCPA

මෙම වර්ගීකරණයට අමතරව වල්නාශක යොදන අවස්ථාව අනුවද වර්ග කරලීම සිදුකළ හැකිය.

1) බෝගය සිටුවීමට පෙර යොදන වර්ග
                උදා: පැරකොට්

2) පූර්ව නිගමන වල්නාශක
බීජ හෝ පැළ සිටුවීමෙන් අනතුරුව වල්පැළෑටි මතුවීමට ප්‍රථමව පසේ තෙත සහිත අවස්ථාවල යෙදීම සිදුකරනු ලැබේ.
උදා: ඇලක්ලෝ, බියුටක්ලෝ

3) පශ්චාත් නිර්ගමන වල්නාශක
වගාවේ වල්පැළ මතුවීමෙන් අනතුරුව යෙදීම සිදුකරලයි.
උදා: 2,4 D , M.C.P.A , ග්ලයිෆොසෙට්

ඉහත ක්‍රම 2ට අමතරව වල්නාශක පසට යොදන වර්ග හා පත්‍රවලට යොදන වර්ග ලෙසද බෙදා දැක්විය හැකිය.

·         පසට යොදන වල්නාශක

බොහෝවිට මෙහිදී යොදනු ලබන්නේ පූර්ව නිගමන වල්නාශකයි
උදා: ඇලක්ලෝ, බියුටක්ලෝ

·         පත්‍රවලට යොදන වල්නාශක

උදා: 2,4 D, M.C.P.A

වගා භූමියකදී යෙදිය යුතු රසායනික වල්පැළෑටි නාශකය නිවැරදිව තෝරා ගැනීම ඉතා අත්‍යවශ්‍ය වන අතර ඉහත වර්ගීකරණ පිළිබඳ අවබෝධය ඒ සදහා වැදගත් වේ. එසේම වල්නාශක භාවිතයේ පහත කරුණු පිළිබඳවත් දැනසිටීම වැදගත් වේ.
* භූගත කදන් සහිත වල්පැළ පාලනය කරලීම සදහා සංස්ථානික වල්පැළෑටි නාශකයක් භාවිතා කිරීම අත්‍යවශ්‍ය වේ.
* භූගත කදන් රහිත වල්පැළ පාලනය සදහා ස්පර්ශ වල්නාශක යෙදීම ප්‍රමාණවත් වේ.
* බෝගය ස්ථාපනය කිරීමෙන් අනතුරුව වල්නාශක භාවිතා කරන්නේ නම් තෝරා නසන වල්නාශක වර්ගයක් තෝරා ගැනීම උචිතය
* බෝගයක් ස්ථාපනය නැති අවස්ථාවලදී හා බහුවාර්ෂික බෝගවල පැළ අතර ඇති වල්පැළ පාලනය කරලීම සදහා සියල්ල නසන වල්නාශකයක් යෙදීම උචිතය

මෙම රසායනික වල්නාශක භාවිතය පහසු වුවත් ඒවායේ ඇති අහිතකර ප්‍රථිපලද රැසකි. මේවා මිනිසාට, සතුන්ට හා පරිසරයට ගෙන දෙන්නේද විනාශකාරි ප්‍රථිපලයකි. එබැවින් මෙම වල්නාශක භාවිතා කරලීම හැකිතරම් අවම කර ඒකාබද්ධ වල්පැළ පාලනය වැනි ක්‍රමවේදවලට මූලික තැනක් දීමට ගොවීන්, සිසුන් හා වගාකටයුතු කරන සියලු දෙනා වග බලා ගැනීම කාලෝචිත වේ.





Thursday, 14 September 2017

රජයේ විභාග සදහා සාමාන්‍ය දැනීම - 6 වන ප්‍රශ්න පත්‍රය


රජයේ විභාග හා අනෙකුත් විභාග වලදී සාමාන්‍ය දැනීම යනු ඔබට මුහුණ දෙන්නට වන තවත් එක් අභියෝගතා ප්‍රශ්න පත්‍රයකි. එකී විභාග වලට සහභාගී වන ඔබ සැම වෙනුවෙන් යම් උපකාරයක් කිරීමට අප තීරණය කළේ මීට මාස කිහිපයකට ඉහතදීය.
ඒ අනුව ලිපි 5ක් යටතේ ගැටලු 125ක් හා ඒවායේ පිළිතුරු දැනටමත් අප ඔබ හමුවේ තබා අවසන්ය. අද දිනයේ අප ඔබ වෙත ගෙන එන්නේ එහි හයවන අදියරයි.
මෙම ප්‍රශ්න හා පිලිතුරු හොදින් අධ්‍යනය කර ඔබගේ දැනුම වැඩි කරගන්න. එසේම මෙම ලිපිය ඔබගේ අනෙකුත් මිතුරන්ටත් උපකාරී වන ලෙස Facebook, Twitter, Google Plus වල share කරන්න.

ගැටලු

1) "මස්කට්" යනු කිනම් රටක අගනුවරක්ද?

2) කුරුණෑගල අගනුවර කරගත් ප්‍රථම පාලකයා කවරෙක්ද?

3) ශ්‍රී ලංකාවේ පොල් පරියේෂණායතනය පිහිටා ඇත්තේ කොහේද?

4) ආර්ථික වගාවක් ලෙස ශ්‍රී ලංකාවේ තේ වගාව ආරම්භ කරන ලද්දේ කවරෙකු විසින්ද?

5) ශ්‍රී ලංකාවේ ප්‍රථම තැපැල් මුද්දරය නිකුත් වූයේ කවදාද?

6) ලෝකයේ වැඩිම ජනගහනයක් සහිත රට කුමක්ද?

7) ශ්‍රී ලංකාවේ ප්‍රථම ජන සංගණනය පවත්වා ඇත්තේ කිනම් වසරකද?

8) මැරතන් ධාවන තරගයක සම්මත දුර ප්‍රමාණය කොපමණද?

9) ශ්‍රී ලංකාව හා ඉන්දියාව අතර ඇති සමුද්‍ර සන්ධිය කුමක්ද?

10) ශබ්දයේ තීව්‍රතාවය මනිනු ලබන ඒකකය කුමක්ද?

11) ලෝක ආහාර දිනය කවදාද?

12) සෝමාලියාවේ අගනුවර කුමක්ද?

13) ඉන්දියානු ජාතික ගීය කාගේ නිර්මාණයක්ද?

14) ප්‍රථම වරට පාර්ලිමේන්තු ක්‍රමය මෙරටට හිමිවුණේ කුමන කොමිසමෙන්ද?

15) නොබෙල් ත්‍යාගය ආරම්භ කළ පුද්ගලයා කවුරුන්ද?

16) එංගලන්තය හා ප්‍රංශය අතර ඇති සමුද්‍ර සන්ධිය කුමක්ද?

17) ශ්‍රී ලංකාවේ රූපවාහිනී විකාශනය ඇරඹුණේ කවදාද?

18) "තේසවලාමේ නීතිය" ක්‍රියාත්මක වන්නේ කිනම් ජන කොට්ඨාශයක් අතරේද?

19) බඹරකන්ද දියඇල්ල අයත් ගංගාව කුමක්ද?

20) ඔලිම්පික් වර්ණ මොනවාද?

21) කාර්මික විප්ලවය ආරම්භ වූයේ කුමන රටකින්ද?

22) මුල්ම සිංහල සංදේශ කාව්‍යය කුමක්ද?

23) ලෝක සෞඛ්‍යය දිනය කවදාද?

24) බ්‍රිතාන්‍යයේ ජාතික ක්‍රීඩාව කුමක්ද?

25) රේඩියම් සොයාගත් විද්‍යාඥයා කවුරුන්ද?



පිළිතුරු

1) ඕමානය
2) දෙවන බුවනෙකබාහු
3) ලුණුවිල
4) ජේම්ස් ටේලර්
5) 1875/04/13
6) චීනය
7) 1871
8) සැතපුම් 26 යාර 358
9) පෝක් සමුද්‍ර සන්ධිය
10) ඩෙසිබල්
11) ඔක්තෝබර් 16
12) මොගඩිෂු
13) රවින්ද්‍රනාත් තාගෝර්
14) සොල්බරි ආණ්ඩුක්‍රමය
15) ස්වීඩන් ජාතික ඇල්ෆ්රඩ් නොබෙල්
16) ඩෝමර්
17) 1979
18) උතුරේ දෙමළ ජනතාව අතර
19) වලවේ ගඟ
20) නිල්, කහ, කළු, කොළ, රතු
21) එංගලන්තය
22) මයුර සංදේශය
23) අප්‍රේල් 07
24) ක්‍රිකට්
25) මාරි කියුරි


Friday, 25 August 2017

ජීවිතය හා මරණය පිළිබඳ ඇපල් නිර්මාතෘ ස්ටීව් ජොබ්ස් කළ ප්‍රසිද්ධ දේශනය

ස්ටීව් ජොබ්ස් යනු ලෝක ප්‍රසිද්ධ ඇපල් සමාගමේ නිර්මාතෘවරයාය. අද "ඇපල්" යන වචනය ඇසෙන විට අපට මතක් වන්නේ කෑමට ගන්නා ඇපල් නොව Apple iPhone,iPod ආදියයි.
ස්ටීව් ජොබ්ස් ඇපල් සමාගම පටන් ගන්නේ සිය නිවසේ ගරාජය තුළිනි. පසුව ඩොලර් බිලියන ගණනක් වටිනා සමාගමක් දක්වා එය දියුණු කරන්නේ ඔහු තුළ වූ අප්‍රත්‍යත්ත ධෛර්‍යය හා අසීමිත කැපවීම තුළිනි.
මේ ගමන තුළ ඔහු මුහුණ දෙන කම්කටොලු එමටය. විටෙක ඔහු නිර්මාණය කළ සමාගමෙන්ම ඔහු නෙරපා දමයි. නමුත් ජොබ්ස් ගේ ගමන නැවතීමට ඒ කිසිවෙකට නොහැකි වෙයි. සැමවිටම නව දැක්මක් ඇතිව වෙනස් වෙනස් දේවල් කිරීමට ජොබ්ස් සෑමවිටම උනන්දු විය. මේ නිසාම ඇපල් සමාගමේ සමහර නිෂ්පාදන වලට සම කිරීමට අදටත් අලුත් සමාගම් වල නිෂ්පාදන වලට නොහැකි වී ඇත.
ආදරය,ජීවිතය හා මරණය පිළිබද ජොබ්ස්ගේ අදහස ලොව පුරා බොහෝ දෙනකුගේ අවධානයට යොමු වූයේ 2005දී ස්ටැන්ෆර්ඩ් විශ්වවිද්‍යාලයේ උපාධි ප්‍රධානෝත්සවයේදී ඔහු කළ කතාව නිසාවෙනි. එම දේශනය තුළදී ඔහුගේ ළමා කාලය ගෙවුණු ආකාරය, ඇපල් සමාගම නිර්මාණය වූ ආකාරය සේම ඔහු ඇපල් සමාගමෙන් නෙරපා දැමූ ආකාරය ගැන ඔහු සදහන් කර ඇත. එසේම ආදරයේදී ඔහු පරාජය වූ හා ජයගත් අයුරු සේම මරණයේ අන්තයටම ඔහු ගමන් කළ ආකාරය ඔහු දක්වා ඇත.
මෙම දේශනයෙන් ජීවිතයට ගත හැකි දේ අසීමිත යැයි කීවොත් වරදක් නැතැයි සිතමු. මන්ද ඒ තරම් වටිනා අදහස් එහි ගැබ්ව ඇති නිසාය. පහතින් එම දේශනය නරඹන්න.....


මෙම ලිපිය හා මෙම වීඩියෝව ඔබගේ මිතුරන්ටත් නැරඹීමට හැකිවන ලෙස පහතින් Facebook,Twitter,Linkedin,Google Plus තුළට share කිරීමට අමතක නොකරන්න.